Pag-abot mo pa sana, padangat
Magpoon ka nang magpaaram:
Mahaloy ka man o madali sana
Saro an sigurado: mahali man ika
Gurano man katagas panuga
Nin pagkamoot, ini mawawara;
An gabos minatiko, minatapo sa haloy
Daeng dulagan sa gumlo kan panahon
Anong saysay kan paghapiyap,
Kan pagpadaba, kan mga pangarap?
Memorya man nin rosas mapapara
An ngirit ngonyan, sa aga luha.
‘Tampad kan pagdatong, paghumale
Tama man o sala, ika mahibi
Anuman na minapoon
Pagabot sa poro tatapuson:
Kasunod kan kumusta ka
Padangat ko, paaram na.
Maski pantas napapanlingaw
Pangaturogan, panuga, pag-omaw
Sa duros ilulupad, sa uran matutunaw:
Pag-abot mo pa sana
Ika magpaaram na.
Ini an nalingawan kong abangan
An pag-abot kan sakong kamunduan:
Hinihidaw ko an pagbalik mo giraray
Maski pa ngani, lugod man ipaglikay –
Ini na an huri mong pagpa-paaram.
(December 20, 2023)
Hamudyong 