Ibang klaseng hamon o challenge an pagsurat nin fiction. An disiplina. An paghaman nin mga karakter, an pagmukna nin mga bagong kinaban. Siyemre, si spelling mo, o grammar. Maski Bikol ‘yan, may sala asin tamang porma ang mga tataramon. Kadakol an mga bagay na paninimbangan asin paninimbagan (things to consider and to be responsible for). Alagad, sa huri, dapat saro lang ang mangyari. Magsurat ka. Dae maghanap nin excuse o dahilan tanganing dae mag-surat.
Ini an mga hulit ko (tips man ngaya):
- Magsurat mu’na. Sa utak mo, igwa diyan nin permanenteng pakialamero. Igilid muna ining pasaway na editor asin kritiko. Bayaan mo mu’nang hinghingan ka kan mga anghel, kan saimong muse. Si built-in mong paratuyaw? May oras man siya.
- Makanood maghalat. Sa enot, maabot an ideya na puropidaso. Dae magha’dit. Magsurat sana. May oras na mabibilog siya, mahihinog.
- An ideya garong kristal na minsan, dae mo mahihiling an kinang, pero yaon ‘yan. An mga bagay, parte kan sarong kabilogan. Pag namatean mo na ini, aram mong nakua mo na.
- Magsurat ka ta parasurat ka. An saimong panurat pwedeng may darang maray na katukduan, malinaw man ini o bako. Magsurat ka mu’na, ano man an katuyuhan mo, ano man an mensahe mo. Dae siya masasabotan kan iba kun dae man siya mababasa.
- Magsurat ka ta parasurat ka. Sayang an oras mo sa kinaban kun dae ka magsurat. An karpintero, nagkakarpentero. An parasira, nagsisira. An paratanom, nagtatanom. Ika parasurat, magsurat ka. Pag ika nag-succeed, mari-realize mo: ika man palan karpintero, ta may tigtugdok kang mga estaran nin imahenasyon. Ika palan, parasira man ta naglaladop ka sa mga kairaroman. Ika man paratanom ta… (Aram mo na an kasugpon!)
Panhuri, dae pakaseryosohon na sobra an mga bagay-bagay. Pwedeng sala man an mga sinabi ko digdi. Dae bale. An gabos na bagay nalilingawan man kan kinaban, pati na si mga isinurat mo o isusurat pa sana, magayon man ini, seryoso o kabulastogan.
Hamudyong 